Гила мекард зи Маҷнун Лайлӣ,
ки шуда робитамон Email-ӣ.
Ҳайф аз он робитаи инсонӣ,
ки чунин шуд, ки худат медонӣ.
Ишқ вақте бишавад "Dotcom”-ӣ,
ҳосилаш нест ба ҷуз нокомӣ.
Нозанин! Хӯрда магар гург туро?
Бурда ё "Dotcom”-у "Dotorg” туро?
Баҳрат Email задам пештарак,
ҷои "Sobject” навиштам "ба дарак!”
Ба дарак гар дили ман ғамгин аст,
ба дарак гар ғами ман сангин аст.
Ба дарак робита гар хӯрда тарак,
қатъи он ҳам ба ҷаҳаннам, ба дарак!
Он қадар дилхур аз ин Email-ам,
ки ба ин робита ҳам бeмайлам.
Марги Лайлӣ, "Net”-у "Met”-ро вел кун,
ҳамаро ҷои "Ok” "Cancel” кун.
"Off” кун компютерро Ҷонам,
ёри ман бошу бибин ман "On”-ам.
Агарат ҳарфию пайғоме ҳаст,
рӯи коғаз бинависаш бо даст.
Нома як ҳолати дигар дорад,
хати ту лутфи мукаррар дорад.
Хаста аз "Font”-у зи "Format” шудаам,
дилхур аз гирдолии @ (атсайн) шудаам.
Кард "Replay” ба Лайлӣ Маҷнун,
ки дилам ҳаст аз ин "Sobject” хун.
Боше фардо телефон хоҳам кард,
ҳар чи гуфтӣ, ки бикун хоҳам кард.
Зудтар пеши ту хоҳам омад,
ҳей мураттаб ба ту сар хоҳам зад.
Рост гуфтӣ ту азизам Лайлӣ,
Дигар аз ман нарасад email-ӣ.
Номаи пост намудам баҳрат,
Ба умеде, ки сар ояд қаҳрат.
