Муовини дабири кулли СММ дар умури назорат ва муқобила бо қочоқи маводди мухаддир ва ҷиноёти созмонёфта, Тоҷикистонро намунаи муваффақи мубориза бо қочоқи маводди мухаддир ва улгуе барои соири кишварҳои Осиёи Марказӣ донист.
Ба гузориши хабаргузории Форс, Юрий Федотов муовини дабири кулли СММ ва Эмомалӣ Раҳмон, раиси ҷумҳури Тоҷикистон, дар мулоқот бо якдигар, дар бораи лузуми тақвияти тадобири муштарак дар мубориза бо қочоқи маводди мухаддир аз Афғонистон ба дигар манотиқ, баҳс ва табодули назар карданд.
Дафтари матбуоти раёсати ҷумҳурии Тоҷикистон низ бо судури иттилоияе, зимни ситоиш аз фаъолияти ниҳоди мубориза бо қочоқи маводди мухаддири Тоҷикистон, таҷрибаи ин кишварро барои дигар ҷумҳуриҳои Осиёи Миёна муҳим донист.
Дар ин иттилоия омадааст: "Муовини дабири кулли СММ эълом кардааст, ки ин созмон дар интиқоли таҷрибаи Тоҷикистон ба кишварҳои минтақа, бо мақомоти Душанбе ҳамкориҳои лозимро анҷом хоҳад дод”.
Ба гуфтаи Федотов, ҷомеаи ҷаҳонӣ агарчи дар ҷанг бар зидди омилони қочоқи маводди мухаддир мағлуб нашудааст, аммо дар ҳоли ҳозир, пирӯз ҳам нест ва бинобар ин ба тақвият ва тавсиаи таҷриба дар ин замина ниёз дорад.
Ниҳоди мубориза бо қочоқи маводди мухаддири Тоҷикистон 10 сол қабл таъсис шуд, ки ниҳоди муштараке байни Тоҷикистон ва СММ маҳсуб мешавад.
Бино бар эъломи дафтари СММ дар Тоҷикистон, муовини дабири кулли ин созмон, рӯзи гузашта вориди Душанбе шуд ва қарор аст бо мақомоти вазоратхонаҳои кишвар ва умури хориҷа ва сафирони Русия ва Амрико дар Тоҷикистон дидор кунад.
