Раҷаб
Тайиб Урдуғон нахуствазири Туркия имрӯз панҷшанбе (16.12.2010) дар
маросими азодории даҳҳо ҳазор нафар аз мусалмонони Истанбул, бо маҳкум
кардани ҳодисаи террористии Чобаҳор дар Эрон гуфт: "Уммати исломӣ бояд
бо ваҳдати худ оташи фитнаҳоро хомӯш кунад”.
Ба гузориши Irna, Урдуғон дар ин маросим, ки бо ҳузури Алиакбари Вилоятӣ мушовири сиёсии раҳбари Эрон, уламои Туркия ва ҳазорон тан аз дӯстдорони Имом Ҳусайн баргузор шуд, хотирнишон кард: "Ҳар ҳодисаи дардноке, ки дар ҷаҳони ислом ба вуқӯъ мепайвандад, моро ба ёди ҳодисаи Карбало меандозад ва мо дарди ҳар мусалмонеро дар ҳар минтақаи ҷаҳон дар қалби худ эҳсос мекунем”.
Нахуствазири Туркия бо бузургдошти ёду хотираи Имом Ҳусайн афзуд: "Шаҳодати ҳазрати Имом Ҳусайн дар рӯзи Ошуро ба маънои видоъ нест, балки дарси зиндагӣ аст. Он ҳазрат бо хуни поки худ ба мо дарси парҳез аз ҳирсу тамаъу зулму ситамро дод”.
Урдуғон афзуд: "Мо дигар дар ҳеҷ нуқта аз ҷаҳон намехоҳем шоҳиди такрори ҳодисаи ҷонсӯзи Карбало ва кушту куштори мазлумон бошем”.
Вай таъкид кард: "Мусалмонони минтақа сарнавишти муштарак доранд ва бояд бо канор гузоштани тафовутҳо ва тақвияти ваҳдат дар миёни худ оташи фитнаҳоро хомӯш ва бародарӣ байни худро мустаҳкамтар кунем”.
Салоҳуддин Узгундуз раҳбари шиаёни Туркия дар ин бора гуфт: "Ҳузури Раҷаб Тайиб Урдуғон дар маросими Ошуро, фитнагарони хориҷиро ноумед кард”.
