Коршиноси барҷастаи масоили динии Қирғизистон гуфт, ки ислом ва терроризм ду мақулаи ғайри муртабит ҳастанд.
Қодир Маликов бо ишора ба иқдомоти мақомоти Қирғизистон ба манзури ташдиди мубориза бо гурӯҳҳои террористӣ гуфт: "Қирғизистон набояд иштибоҳоти кишварҳои дигарро такрор кунад ва терроризмро бо дини мубини ислом муртабит бидонад”.
Ба гузориши АКИpress, раиси Маркази таҳлилии мустақилли "Дин, ҳуқуқ ва сиёсат” дар ҷамъи хабарнигорони Бишкек гуфт: "Бо таваҷҷӯҳ ба ин ки Қирғистон дорои мудирияти лоик аст ва ислом дини ағлаби мардуми ин ҷумҳурӣ аст, бархӯрди номуносиб бо ин мавзӯи ҳассос метавонад мусалмонони кишваро дар мухолифат бо ниҳодҳои расмӣ қарор диҳад”.
Ба гуфтаи Маликов, мубориза бо падидаи терроризм тӯлонӣ хоҳад буд ва дар ин росто танҳо арзишҳои ислом метавонад идеулужии терроризмро шикаст бидиҳад.
Вай гуфт, ки ҳимояти маънавӣ ва ҳуқуқии шахсиятҳои шинохта ва руҳоният ҳоизи аҳамият аст.
Раиси Маркази таҳлилии мустақилли "Дин, ҳуқуқ ва сиёсат” хотирнишон кард: "Аз назари ислом, амали гурӯҳҳои террористӣ дар ҷануби Қирғизистон ҷиҳод нест ва дар заминаи хусумати қавмӣ ва ҷудоиталабӣ анҷом мегирад”.
Қодир Маликов таъкид кард, ки дини мубини ислом қавмгароӣ ва террорро мамнӯъ донистааст.
Вай иброз дошт, ки ҳадаф аз истиқрори гурӯҳҳои мусаллаҳи ғайри қонунӣ дар манотиқи ҷанубии Қирғизистон, талош барои бадном сохтани ислом ва эҷоди ихлол дар авзоъи ин манотиқ аст.
Ин коршиноси барҷастаи масоили Қирғизистон изҳори нигаронӣ кард, ки дар сурати идомаи ин раванд, қирғизҳо ва ӯзбактаборони ҷануби Қирғизистон, ба рағми иродаи худ, дар ҳолате қарор мегиранд, ки сарнавишти онҳо ба дасти созмонҳои байналмилалӣ вогузор хоҳад шуд ва давлати марказӣ таъсири худро аз даст хоҳад дод.