Эшони Нуриддинҷон Тӯраҷонзода, руҳонии саршинос ва имом-хатиби масҷиди ҷомеи Муҳаммадияи ноҳияи Ваҳдат тасреҳ кард: "Язидиён бо олуда кардани моҳи Муҳаррам ба хуни хонадони пок, чеҳраи худро дар таърих то қиёмат сиёҳ карданд”.
Ба гузориши хабаргузории Форс дар Душанбе, Эшони Нуриддинҷони Тӯраҷонзода, дар хутбаҳои намози ҷумъаи ин ҳафта (17.12.2010) инчунин афзуд, тосуо ва ошӯрои ҳусейнӣ, пайванддиҳанда ва омили ваҳдат миёни уммати ислом ва ҳифзи арзишҳои исломии ҳамаи мазоҳиб аст.
Вай хотирнишон кард: "Таҷлил аз Ошӯро, аз суннатҳои аслии дини мубини ислом аст ва гиромӣ доштани ин маросим омили муҳимме барои таҳкими ваҳдат ва инсиҷом миёни ҳамаи мазоҳиби дини ҳанифи ислом аст”.
Тӯраҷонзода тасреҳ кард: "Моҳи Муҳаррам, ки аз даврони пеш аз ислом байни ақшори мухталифи ҷомеа мӯҳтарам ба шумор мерафт, ба дастури душманони дин, ба хуни хонадони Паёмбари Акрам (с) олуда гашт”.
Ин руҳонии саршиноси тоҷик, ки суханонаш ба таври мукаррар бо садои гиряву фиғони ошиқони ислом қатъ мешуд, ин рӯйдодро аз фаҷеътарин ҳаводиси таърихи ислом зикр кард ва гуфт, ки акнун моҳи Муҳаррам ҳар сол бо вуруди худ ёдгори талхе аз ҳодисаи дашти Карбало ва куштори хонадони Паёмбар (с)-ро дар қалбҳои мӯъминин бедор месозад.
Вай хотирнишон кард: "Душманони ислом бо ин иқдоми худ қасди коҳиши нуфузи ин дин дар байни ҷомеа ва аз байн рафтани хонадони гиромии Паёмбари Ислом (с)-ро доштанд, аммо ин душманон ҳофиз будани Худовандро ба фаромӯшӣ супурда буданд ва ғофил аз он буданд, ки Худованд бо лутфу марҳамати худ ин хонадон ва дар канори он дини мубини исломро то қиёмат ҳифз хоҳад кард”.
Тӯраҷонзода афзуд: "Язидиён бо олуда кардани моҳи Муҳаррам ба хуни ин хонадони пок, чеҳраи худро дар таърих то қиёмат сиёҳ карданд”.
Имом-хатиби масҷиди Муҳаммадия тасреҳ кард: "Дӯст доштани Оли Паёмбар (с) аз воҷиботи имон аст ва ҳар касе ки хонадони Набии Акрам (с)-ро дӯст бидорад, подоши ӯро Худованд барояш арзонӣ хоҳад дошт”.